I'm a Baby!

Galeng ako sa Boracay dahil ang tunay na lalake hindi sa Puerto Galera nagbi-beach!

Isang linggo ako ru’n, walang pakialam sa trabaho dahil ang tunay na lalake, tambay!

Si Ace ang nagwawalis ng kuwarto namin, at nagtitiklop ng mga damit kong nakakalat sa kama dahil ang tunay na lalake burara!

Ngayon, mukha akong ulikba dahil ang tunay na lalake hindi nagsa-sunblock, lalo na sa mukha!

Hindi ako nag-fine dining-fine dining du’n, pero iba’t ibang inumin ang nilagok ko, breakfast hanggang madaling araw dahil ang tunay na lalake lasenggo!

Andu’n talaga ako sa Boracay kasi may karera ang UP Dragonboat Team dahil ang tunay na lalake hindi nagbabakasyon para mag-“relax” lang, dapat may ginagawang adbentsur!

Tinalo namin ang Ati Bugsay at ang Boracay All-Stars sa 500-meter races. Importante ‘yun sa’kin dahil ang tunay na lalake may arch-enemies!

Kaya nu’ng inalon kami nu’ng semis kaya't sila pa ang nakapasok sa finals at hindi kami sa 300-meter races the next day, sumama ang loob ko dahil ang tunay na lalake instense…pero hindi ako nagpakita ng emosyon dahil ang tunay na lalake hindi umiiyak!

Binuhos ko na lang ang sama ng loob ko sa post-race dinner. Nakipag-unahan ako sa buffet table, sumingit sa pila, hindi pinauna ang mga babaeng teammates, at binundok ang plato ng lahat ng ulam, at umulit-ulit pa dahil ang tunay na lalake masiba!

Tapos maya-maya parang sumakit na tiyan ko. Pumuslit na’ko sa hotel, naglakad papunta sa iniisteyan namin dahil ang tunay na lalake walang pakialam kahit mabasa siya ng ulan!

Hiningi ko ‘yung susi sa front desk, dali-dali akong umakyat ng hagdan papunta sa kuwarto pero naabutan ako bago pa man ako nakapasok ng pinto pero ok lang dahil ang tunay na lalake, may tae sa brip.